Züberoko maskaradet ako Gatüzainaz
Thierry Truffaut
Jean Michel Guilcher jaunaren ikerlan batek erakutsi deigünaz, Maskarada gorriaren Aitzindarietako parteliant hau igaran mente ürrentzean baizik ez da saldo
hortan sartü.
Dantzari
entrabaleko bat bezala ikusirik izan da lüzaz eta, bereziki,
txaskoini egile eginkizün bat emaiten zeion.
Orai berri
artino, personaje honen sorterroetaz ez günüan argibide hanitx bena mürrü margo
zahar elibat bai eta Andorrako Ordino herriko ihauteriak ikusi ondoan,
parekatze zonbait egin ahal üken dütüt.
Ikusteko parada üken düdan lehen mürrü margoa Pariseko
Libürütegi Nazionalean goititürik da.
Hontan, 'Comédiens de l'Hotel de Bourgogne' antzerki saldoko
personaje bat ageri da 'Gatüa' izenez ezagützen dügün tresna bat esküetan.
Erabilteareki lüzatzen den trükesa gisako trastü horri
'Happe-Chair' izena ere eman ohi zaio.
Personaje horrek badü lapurtar Ihautirietako 'Ponpierra'
delakoareki egite handia, honek ere, bere ertzo builtetan, 'Haizturra' izeneko
tresna berberra erabilten beitü.
Arren, Gatüzain
bai Ponpierra txaskoini egile eta ertzoen mündü batez mintzo zeizgü eta mente
bat beno zaharrago diren beren jauntsietako margoak berak ere, hots
hoili-urdinak, ez dira balinban gertüzkoak.
Ezi, saldoko
beste partelianten gorriarekin bi margo horik ez dira
aurride eta direla.
Holiaren kasüan
ezagütürik da hori, bena urdina ere agertzen da üsü
idatzi zaharretan ageri diren marrazkietako ertzoen erredoletan. Artetik erraiteko ere, Eüskal Herriko
ihautirietako beste personaje zonbaitek ere jauntsi ñabarrak badütüe, hala nola
Oioneko 'Katxi'-k (Araba), Otsagiko 'Bobo'-k edo Lantzeko 'Mozorro'-ek
(Nafarroa).
Ata, Gatüzainaren
lehenagoko arropa ez zen hori. XIX. Mente ürrentzeko eta XX. Hatsarrekoa den
Baionako Eüskal Erakustokian goititürik dena, zolatik gain xuri da. Soinekoak,
halere, xerrenda gorri eta urdineko pezaz eta holi, urdin eta gorri diren ttaka
elibatez apaintürik da. Horrek, düda denmendrenik gabe, Andorran kausitzen den
Ordinoko ihautirietako 'Arlequins' personajeak oritarazten dütü.
Ezi, horiek ere,
beren jauntsi xurietan peza margodünak badütüe nahiz eta xuria den nausi
egoiten. Xüxenean baniz, arren, Gatüzaina, Arlequin kenteko personajeetarik
lizateke.
Erromako Ederlan
eta Ohidüretako Erakustokian ikusten ahal den beste margo batek ere barneago
ikertzera lagüntzen gütü.
Honek, XIX. mentean
Erromako ihautiriak erakusten deizgü eta personajeen artean ageri da bat balku
batetan den neskatila bat atzaman
beharrez 'Gatüa' üdüri tresna bateki.
Horrek, jüstoki, oritarazten
deigü, Züberoako honenbeste bat erranetan tresna hori aipatürik zela eta
erraiten züela neskatilen atzamaiteko, haurren lotsarazteko, maskarader bidea
zabaltzeko (egünko egünean, Txerreroak bere Txerrarekin egiten düana) eta
bijitatzen ziren etxeetan 48 lükainkak selauretik ebasteko erabilirik zela.
Azken gertakari
hau Maskak deitü gaüaz gaüeko maskarada elibatetan
agitzen zen, maskatürik eta zirzilki bezti zen saldo bat etxeetan sartzen
zelarik, Gatüzain bat aitzinean.
Basabürüan bada errana
ere Basa Jaunari zor zirenen bila horra zela hau.
Etxeetan sartze
horrek ere Arlequin personajeareki zerbait lotüra balüke. Ezi, 1580. eko mürrü
margo batek Harlequin zirzill bat erakusten deigü eta dakigünez, pilda txar
horietan kurritzen ziren eta haurrak iziarazten zütüen jente tristant elibat
bat bezala ezagütürik ziren Alemania, Hollanda eta Flandria gainti horietan.
Kartiel
horietan hilen txerka horra ziren beste mündüalat
lagüntzeko.
Sineste hori ere
bizi-bizian da Gaskoina eta Eüskal Herrian, 'Artus erregearen ihiztekak',
'Errege Xalamon' eta 'Mateo Txistu' izenez. Artus eta Hartzaren artean
parekatze bat egitea ere balegoki zeren gogoan etxeki behar beita, lehenagoko
denboretan, hartzaz ustekeria bazela hilen txerka horra zela.
Arren, Gatüzainaren sorterroa, bidez bide zebilen jente zirzill eta tristant horren oritzapenean litzateke eta honen egitekoa zen urte zaharrez etxeetan agitü ziren hilen eramaitea bere Gatüa baliatzez, ber zoinean ere, hatüen hartzez ordain gisa.